Блогчево ми се претвара во гранола, банана леб и палачинки ама не можам да си помогнам кога тие ми се омилени работи да ги готвам, да ги јадам и да експериментирам со нови вкусови и рецепти.
Овој пат ви носам нов рецепт за банана леб со истиот неверојатен вкус ама со мал пресврт и во чекор со есенскиве вибрации 😊 WOW. Видете ги овие поетски зборови што излегуваат од мојата уста (хаха).
Се надевам ќе ви се допадне овој банана бред исто како и претходните.
Банана-цимет есенски леб:
Состојки:
- 2 средни банани (испасирани да бидат во количина од 1 cup)
- 2 јајца
- 72 гр. (1/3 cup) кокосово масло, стопено
- 105 гр. (1/3 cup) јаворов сируп (или друг течен засладувач)
- 60 гр. (1/4 cup) млеко од бадеми (или млеко по желба)
- 225 гр. (2+1/4 cup) овесно брашно (овес сомелен во блендер)
- 1 лажичка цимет
- 2 лажички прашок за пециво
За цимет филинг: (по желба ама ептен препорачливо)
- (1/4 cup) пире од јаболки
- (1/4 cup) кокосов шеќер (или кафеав шеќер)
- 1 лажичка цимет
Начин на подготовка:
- Се загрева рерната на 170º и се поставува хартија за печење на тава за печење леб.
- Во голем длабок сад се додаваат пасираните банани, јајцата, кокосовото масло, јаворовиот сируп и млекото. Убаво се промешува, за да се изедначат и соединат состојките.
- Во помал, длабок сад се додаваат сите останати состојки (овесно брашно, прашок за пециво, цимет) се промешува. Оваа смеса се додава на течната смеса во големиот сад и се меша се додека е убаво соединето и сите состојки се соединети со што е можно помалку грутки. Смесата треба да биде густичка.
- Во мал, длабок сад се додаваат сите состојки за цимет филингот. Се промешува за да се соединат. Се трга садот на страна.
- Во тавата за печење леб се додава половина од подготвената смеса за банана леб. Не мора да биде точно половина, не е толку важно, така од око и одприлика. Се израмнува со лажица или шпатула.
- Со лажица се додава од цимет филингот на банана лебот на одредени места, а потоа со нож се разнесува и се прават swirls односно кружни движења. Не мора да биде перфектно, она што го бараме е оној “мермерен ефект”
- Се додава остатокот од банана лебот врз цимет филингот, а потоа се додава и остатокот од цимет филингот на истиот начин.
- Се пече 50 минути односно додека не добие златеникаста боја и кога со нож или чепкалка не се боцне и не излезе чисто без остаток од смесата.
- Се остава да се олади малку пред да се исече.
ЗАБЕЛЕШКИ И СОВЕТИ:
→ Цимет филингот не е неопходен, може да го направите лебот и без него и ќе биде подеднакво вкусно меѓутоа топла препорака е да го пробате и на овој начин. Превкусно е.
→ Млекото од бадеми може да се замени со било какво млеко по желба.
→ Кокошсовиот шеќер може да се замени со кафеав шеќер. Исто така може да се замени и со течен засладувач како мед, агаве, јаворов сируп и слично со тоа што нема да го има оној зрнест шмек.
→ За да го направите посно, веган може да користите “јајце од ленено семе”. 2 лажици мелено ленено семе + 5 лажици вода. Се мешаат во мал сад и се остава 10тина минути да се направи како гел. Се користи во лебот по истата постапка.