Состојки:

• 45 гр. (1/2 cup) овесно брашно
• 65 гр. (1/2 cup) брашно од хељда
• 1 лажичка прашок за пециво
• 1 лажичка цимет
• 180 мл. (3/4 cup) бадемово млеко (или млеко по желба)
• 1 лажичка сок од лимон
• 1 лажица кокосово масло (стопено)
• 1 лажичка чиа семе (по желба)
• 2 моркови (излупени и изрендани)
• 1 шака оревчиња, исецкани на ситно

Начин на подготовка:

1. Во голем длабок сад се додаваат овесното и хељдиното брашно, цимет и прашок за пециво. Се промешува за да се соединат состојките.
2. На оваа смеса се додаваат бадемовото млеко (или млеко по желба), сок од лимон и кокосовото масло и повторно се промешува се додека течните состојки не се соединат со сувата смеса. 
3. На крај се додаваат ренданите моркови, чиа семето и оревчињата. Се промешува, за да се соединат и распоредат во смесата.
4. Се загрева тава на средна температура и се додава малку масло за готвење (јас користев кокосово масло).
5. Кога маслото ќе биде потполно загреано се додаваат 2 големи лажици од смесата и се формира палачинка. Смесата треба ќе биде доста густа па затоа потребно е да ја формирата палачинката со лажица или шпатула. Се пржи 2-3 минути, се превртува и се пржи уште дополнителни 2 минути. 
6. Постапката се повторува со остатокот од смесата. Со оваа смеса излегуваат околу 5-6 палачинки. 
7. Се сервираат топли со топинзи по желба или пак се чуваат во затворен сад до 3-4 дена во ладилник.

ЗАБЕЛЕШКИ И СОВЕТИ:

→ И овесно и хељдино брашно може да си направите сами. Само додадете зрно хељда/овес во блендер и блендирајте додека не се иситни и не се добие текстура на брашно. Мерете после блендирање.

→ Во овој рецепт нема додадено шеќер, но затоа по желба може да си додадете како топинг, пред сервирање. 

→ Морковите може да ги изблендирате во блендер на ситно или пак ако користите класично ренде, користете го ситниот дел, за да бидат што е можно поситно изрендани.

→ Јас како топинг користев Грчки јогурт (за екстра протеин), свежо овошје и гранола.