Викаат не го живееш карантинот како што треба ако не си направил банана леб. Јас правам леб од банани веќе 2 години по ред така да нема лично да го прифатам ова исмејување. Се шегувам, секако… стварно незнам што е работава со печење леб од банани и изолација, и како тие две работи се поврзани, и зошто одеднаш сите го прават тоа ама не се бунам, 100% ми одговара. 

Веќе споделив една верзија од банана леб, доколку не сте го погледнале – обавезно ѕирнете и таму.

Разликата помеѓу овој леб од банани и претходно споделениот е тоа што во овој рецепт не користиме јајца што значи дека овој рецепт е  вегански и посен. Втората разлика е тоа што во овој рецепт освен што благото доаѓа од бананите, додаваме и дополнително засладувач и затоа е многу поблаго на вкус и се менува текстурата на целиот леб.

Која верзија и да ја одберете – нема да погрешите. Моја препорака е да ги пробате и двата, па самите да одлучите која верзија е повкусна. Јас сеуште неможам да се одлучам.

• 

• 

• 

Леб од банани:

Состојки:

• 2 средни банани*
• 80 гр. (1/4 cup)  јаворов сируп
• 125 гр. (1/2 cup) путер од бадеми
• 37 гр. (1/3 cup) кокосово брашно*
• 1 лажичка цимет
• 1/2 лажичка прашок за пециво
• 1/2 лажичка сода бикарбона

За топингот ( по желба )* :

• полна шака оревчиња, исецкани на мали парчиња
• 2 лажици кокосов шеќер
• 1 лажица кокосово масло, стопено
• 1/2 лажичка цимет
• 1 лажица мелени бадеми

*кога ќе се испасираат бананите треба да добиете околу 1 cup (250gr) банани. Зависно од големината на бананите, може да биде помалку или повеќе од 2 банани

*Кокосово брашно не е исто со кокосови снегулки. Погледнете го овој пост тука за повеќе информации околку кокосовото брашно

*Топингот е по желба. Лебот е вкусен и без ништо одозгора така да доколку не сакате нема потреба да го додавате. Доколку сакате да додадете топинзи по своја желба – слободно направете го тоа

Начин на подготовка:

1. Се загрева рерната на 175º и се припрема тава за печење на леб така што се поставува хартија за печење.
2. Во сад се додаваат сувите состојки. Односно: кокосовото брашно, цимет, прашок за пециво и сода бикарбона. Се промешува
3. Банананите се пасираат се додека не добие текстура на пире. Се додаваат во сад заедно со останатите течни состојки. Се промешува се додека не се соединат
4. Смесата од течните состојки се додава на смесата од суви состојки и се промешува се додека не се соедини 
5. Соединетата смеса се додава во подготвената тава за леб и се распоредува смесата еднакво
6. За топингот, се додаваат сите состојки во мал сад, се промешуваат и се додаваат на површината на смесата со лебот. Нежно се притистнува за малку да навлезат во текстурата од лебот, но не премногу за сепак да бидат како топинг одозгора.
7. Доколку користите топинг по своја желба, користете го истиот чекор
8. Лебот се пече 50 минути. Готов е кога со чачкалица ќе боцнете во средината на лебот и ќе искочи потполно чиста, без залепено тесто на неа
9. Се остава да се олади пред да се исече.

ЗАБЕЛЕШКИ И СОВЕТИ:

→ Лебот може да се чува на собна температура, затворен во сад – 2 дена, а во ладилник и до 4 дена

→ Јаворовиот сируп може да се замени со мед, кокосов шеќер и скоро сите останати засладувачи

→ Путерот од бадеми може да се замени со путер од кикирики, лешници или било кој путер од јаткасти плодови. Одлична замена би било и таан. НЕМОЖЕ да се замени со обичен путер

→ Бананите треба да бидат презреани, со црни точки. Колку се позрели – толку поблаг ќе биде лебот – затоа доколку сте во можност користете такви.