Знам дека за сите рецепти викам е ова е еден од поомилените ама овој рецепт за леб од кокос и бадем е највистински еден од моите омилени 😊. А за да ве уверам зошто е тоа така еве неколку причини

→ Идеален за претходна подготовка на храна. Тоа значи го спремате еден ден во неделата и имате спремен доручек останатите денови

→ Содржи мало количество на шеќер па е идеален за лесен и брз доручек

→ Може да се направат мал милион варијации. Додадете шумско овошје или парчиња чоколадо или исецкани јатки или други слични топинзи по желба за поспецифичен вкус 

→ Има толку богат вкус што и без никакви додатоци пак е подеднакво вкусен

Леб од кокос и бадеми

Состојки

• 75 гр. мелени бадеми *
• 50 гр. сув кокос
• 2 лажици кокосово брашно **
• 1 лажичка прашок за пециво
• 1 лажичка цимет
• 125 мл. млеко од бадем (или било какво млеко)
• 1 лажица стопено кокосово масло
• 2 лажици мед
• 1 лажица сок од лимон
• 2 јајца

• Јас користам блендер за мелење на бадемите. Може да се користи и сецко или мулти практик. Се додаваат бадемите и се користат кратки пулсирања додека не се сомелат комплетно и не се добие текстура на брашно. Може да се користи и брашно од други јаткасти плодови како индиски ореви,ореви или лешници со тоа што вкусот би се сменил

** Кокосовото брашно може да се замени со 4-5 лажици овесно брашно

Начин на подготовка

1. Се загрева рерната на 180º и се поставува хартија за печење на тава за печење леб
2. Во длабок сад се додаваат сите течни состојки (млеко,кокосово масло,мед,сок од лимон и јајца) и убаво се промешува додека не се соедини смесата
3. На оваа смеса се додаваат сите останати состојки и повторно се промешува
4. Смесата треба да биде густа, доколку не е тогаш може да се додаде уште малку кокосво брашно или мелени бадеми
5. Смесата се додава во претходно подготвената тава и се израмнува за на сите страни да биде подеднакво распоредена 
6. Доколку се користат некои топинзи сега е моментот да се додадат
7. Се пече 35-40 минути односно додека не добие златеникаста коричка